【開心有咁錫我嘅老公】自爆穿上婚紗心情 陳凱琳:個肚好以籮籮攣咁

48歲嘅鄭嘉穎今日喺峇里Bvlgari Resort Bali The CHAPEL,迎娶27歲港姐冠軍女友陳凱琳(Grace),嘉穎講到見到Grace行入教即流咗兩條馬尿,但其實佢老婆原來比佢仲想喊。

一直有傳Grace今次係奉子成婚,穿上谷胸婚紗裙嘅Grace暫未見孕味,但上圍卻很豐滿。Grace婚後大講感受,佢話:「首先真係要多謝今次出席我哋婚禮嘅朋友,因為我哋都籌備咗幾個月,朋友都同我哋保守呢個秘密,我呢樣嘢真係好感激佢哋,同時間個個特登請假,好多遠道而嚟我哋婚禮,加拿大又有,歐洲又有,香港又有,星加坡都有,我見到大家咁用心,咁有誠意嚟到我哋婚禮,我哋真係好感恩,好感恩。」
Grace仲大爆行禮前小秘密:「今日我哋行禮前,我叫嘉穎快啲去咗教堂先,因為我唔想畀佢見到我着呢條婚紗,從來都未見過嘅,當我自己着起呢條婚紗,突然之間個肚好以籮籮攣咁,好似好緊張,心跳又加速,我係去到教堂前,我聽到音樂起,深呼吸,同我爹哋一齊蹺住佢隻手,同佢一齊行入嚟,跟住嗰一刻,我見到全部人企起身去歡迎我哋,戥我哋好開心個感覺,我哋原來鋪排呢件事成事啦,跟住我行到最尾時,我已忍住想喊,但我望住嘉穎,佢已流咗一滴眼淚,我估唔到佢竟然比我早喊,自己忍唔住都想喊,所以喺祈禱時已要攞紙巾去抹眼淚,其實呢個感覺有少少現實,真係嚟到呢一刻時,好開心有一個咁好嘅老公,咁錫我嘅老公啦,我亦好期待我哋將來嘅幸福快樂,雖然我覺得婚姻其實有好多階段要經歷,但呢一刻我已覺得最開心。」